झापाको भगवती प्लाइ उद्योगमा भीषण आगलागी, १० वटा दमकल प्रयाेग गर्दा पनि नियन्त्रण भएन आगो

२८ फागुन २०८०,

करोडौं रुपैयाँ खर्चिएर बिलासीका सवारी साधन खरिद गर्न अग्रसर देखिएका झापाका स्थानीय तहका जनप्रतिनिधिले विपद्का लागि आवस्यक पर्ने वरुणयन्त्र किन्न भने कञ्जुस्याई गर्दा झापालीले करोडौं रुपैयाँको क्षति व्यहोर्नु परेको छ । बर्षेनि आगलागीका घटनाबाट करोडौं रुपैयाँको क्षति व्यहोर्दै आएका झापालीले पछिल्लो पटक मेचीनगर–१५ ज्यामिरगढीस्थित भवगती लेमिनेट्स प्लाइउड कारखानामा लागेको आगो नियन्त्रण गर्न भारतबाट समेत दमकल बोलाउनु पर्ने स्थिति सृजना भयो । यस अघि पनि मेची नगरको काँकरभिट्टास्थित जुत्ता कारखानामा भएको आगलागी नियन्त्रण गर्न नसक्दा भारतबाट नै दमकल बोलाउनु परेको थियो । झापाका स्थानीय तहले विपद् नियन्त्रणका लागि खरिद गरिनु पर्ने दमकल खरिदमा चासो नदिँदा झापालीले आगलागीकै कारण करोडौं रुपैयाँ गुमाउनु परेको छ । स्थानीय तहका जनप्रतिनिधि दमकल भन्दा स्काभेटर र डोजर खरिदमा अग्रसर देखिएका छन् । विकास निर्माणका नाममा खरिद गरिएका त्यस्ता सवारी अहिले कवाडीका रुपमा परिणत भएका छन् । तर, विपद्मा आवश्यक पर्ने दमकल लगायतका उपकरण खरिद्मा स्थानीय तहका जनप्रतिनिधिको ध्यान नदिँदा हरेक वर्ष आगलागीका कारण झापामा करोडौं रुपैयाँको क्षति व्यहोर्दै आएका छन् । मेचीनगरस्थित प्लाई उड उद्योगमा लागेको आगो अझैं नियन्त्रणमा आउन सकेको छैन ।झापाका स्थानीय तहमा भएका वरुणयन्त्रले मात्रै आगो निभाउन नसकेपछि छिमेकी जिल्ला सहित भारतबाट दमकल बोलाएको छ । आगलागी नियन्त्रणका लागि भारत नक्सलबारी ग्राम पञ्चायतसँगको सहकार्यमा २ वटा दमकल बोलाइएको झापाका प्रमुख जिल्ला अधिकारी बन्धुप्रसाद बास्तोलले जनाए । सीमावर्ती क्षेत्रमा विपद् आइलाग्दा वारिपारि सहकार्य हुने गर्छ । दुई वर्षअघि काँकडभिट्टाको एसएस फुटवेयरमा आगो लाग्दा भारतीय दमकलको सहयोगमा आगो निभाइएको मेचीनगरका व्यवसायी विजय डालमियाले जानकारी दिए । झापा, इलाम, मोरङ, सुनसरीलगायतका जिल्लाका दर्जनभन्दा बढी दमकलले बिहानैदेखि आगो निभाउने प्रयास गरिरहेका छन् । तर, कारखानाभित्रको केमिकलमा आगो सल्किएकाले नियन्त्रण प्रयास विफल बनेको जनाइएको छ । आगलागीबाट करोडौं क्षति भएको अनुमान गरिएको छ ।