मङ्गलबार, २८ चैत २०७९
नेपालमा कोरोना भाइरसको सङ्क्रमणबाट एक जनाको मृत्यु भएको छ ।स्वास्थ्य तथा जनसङ्ख्या मन्त्रालयका अनुसार पुस २३ पछि नेपालमा मंगलबार एक जनाको कोरोना संक्रमणका कारण मृत्यु भएको हो ।गत पुस २३ गते नेपालमा कोरोनाबाट एक जनाको ज्यान गएको थियो ।यस्तै पछिल्लो २४ घण्टामा १ सय ६ जनामा कोरोना सङ्क्रमण पुष्टि भएको मन्त्रालयले जनाएको छ ।पीसीआर र एन्टिजेन गरी दुई हजार चार सय ३६ जनाको नमुना परीक्षण गर्दा एक सय छ जनामा सङ्क्रमण पुष्टि भएको छ । योसँगै सक्रिय सङ्क्रमितको सङ्ख्या चार सय ६९ जना पुगेको मन्त्रालयले जनाएको छ ।केही दिनयता नेपालमा कोरोना भाइरसको सङ्क्रमण बढिरहेको जनाउँदै मन्त्रालयले स्वास्थ्य मापदण्डको पालना गर्न र कोरोनाविरुद्धको खोप लगाउन आग्रह गरेको छ ।
