आइतबार, जेठ १४, २०८०
कोशी प्रदेशको प्रदेशसभाको दोस्रो तथा बजेट अधिवेशन आज दिउँसोबाट सुरु हुँदैछ । बजेट अधिवेशनको पहिलो बैठक २ बजेका लागि बोलाइएको छ । प्रदेशको बजेट अधिवेशनलाई लक्षित गर्दै पहिचानवादीहरुले प्रदेशसभा भवन अगाडि प्रदर्शन गर्ने तयारी गरेका छन् । गत फगुन १७ गते प्रदेशको नाम कोशी राखेपछि पहिचान पक्षधर असन्तुष्ट छन् । प्रदेश १ पून नामाङ्कन संघर्ष समिति गठन गरेर आन्दोलनमा उत्रिएका पहिचानवादीले प्रदेशसभा अगाडि प्रदर्शन गर्ने तयारी गरेको हो ।आन्दोलनकारीले प्रदर्शन गर्ने भएपछि प्रहरीले सुरक्षा सतर्कता उच्च बनाएको छ । जिल्ला प्रहरी कार्यालय मोरङका प्रवक्ता प्रहरी नायव उपरिक्षक रञ्जन दाहालले सुरक्षा सतर्कता उच्च बनाएको बताए । पहिचान आन्दोलनका नेता प्रेम येक्तेनले प्रदेशसभा भवन घेर्ने तयारी रहेको बताए । उनले आन्दोलन शान्तिपूर्ण हुने बताए । प्रदेशको नाम संसोधन गर्ने थलो प्रदेशसभा नै रहेकाले प्रदेशसभा केन्द्रीत आन्दोलन सुरु गरेको उनको भनाई छ ।प्रदेशसभा अधिवेशनको प्रथम बैठकको कार्यसूची तयार भइसकेको एमाले संसदीय दलका प्रमुख सचेतक रेवतीरमण भण्डारीले बताए ।
