आईतबार, जेठ १४, २०८०,
इटहरी बुढी खोला किनार मोरंगको सुन्दरहरैंचामा रहेको नयाँ वृन्दावन गौशालामा गाईको विशाल प्रतिमा स्थापित गरिएको छ । फाइबरको कच्चा सामाग्री प्रयोग गरेर निर्माण गरिएको गाईको ३५ फिट अग्लो प्रतिमालाई एक तलाको भवनमाथि स्थापित गरिएको हो । उक्त प्रतिमालाई विश्वकै अग्लो गाईको प्रतिमा दावी गरिएको छ । गाईको विशाल प्रतिमाले यस क्षेत्रमा धार्मिक तथा साँस्कृतिक पर्यटन विकास गर्ने अपेक्षा गरिएको छ । ‘नयाँ वृन्दावन गौशाला बनिसकेपछि यस क्षेत्रमा आर्थिक, सामाजिक र भौतिक पूर्वाधारको विकास भएको थियो भने यो गाईका कारण सुन्दरहरैंचा र इटहरी क्षेत्रकै पर्यटकीय र धार्मिक क्षेत्रको विकास हुने विश्वास गरिएको छ । बुढी खोला किनारमा सुनसरीको इटहरी उपमहानगरपालिकासँगै टाँसिएको उक्त नयाँ वृन्दावन गौशालामा यसअघि नै प्रदेशकै सबैभन्दा ठूलो राधाकृष्ण मन्दिर निर्माण गरिएको छ । विभिन्न गोत्रहरुका ऋषिको नेपालकै पहिलो खुला संग्रहालय रहेको उक्त स्थानमा विभिन्न देवीदेवताका मन्दिरहरु, गौशाला, वाटर फाउन्टेन, गुरुकुल निर्माण भइसकेको छ । अहिले आश्रम निर्माणाधिन छ । अहिले उक्त क्षेत्र सुन्दरहरैंचा र इटहरीकै धार्मिक क्षेत्र बनेको छ । गाईको ठूलो प्रतिमा हेर्नकै लागि पनि नेपाल र भारतबाट आगन्तुक, भक्तजनहरु आउने र त्यसले सो क्षेत्रको आर्थिक, सामाजिक, साँस्कृतिक विकासमा अझ ठूलो सहयोग गर्ने विश्वास गरिएको छ ।
