शनिबार, जेठ २०, २०८०
इटहरीमा खुल्ला व्यायामशाला सुरु भएको छ । इटहरी उपमहानगरपालिकाका प्रमुख हेमकर्ण पौडेलले खुल्ला व्यायामशालाको शनिवार उद्घाटन गर्नुभयो । इटहरी उपमहानगरपालिका र स्थानीयवासीको साझेदारीमा इटहरी–१६ स्थित बालग्राम टोलमा व्यायामशालाको उद्घाटन गरिएको हो । व्यायामशाला कुल १२ लाख २३ हजार ३ सय २९ रुपैयाँ ३ पैसाको लागतमा निर्माण भएको हो । उद्घाटन समारोहलाई सम्बोधन गर्दै मेयर पौडेलले स्वास्थ्य भन्दा ठुलो सम्पत्ति अरू केही नहुने बताउनुभयो ।स्थानीय सरकारले इटहरीका सबै वडामा खुल्ला व्यायामशाला निर्माण गर्ने उपमहानगरको नीति अनुरूप चालू आर्थिक वर्षमा ५ वटा व्यायामशाला निर्माण गरिरहेको पौडेलले जानकारी दिनुभयो । आगामी आर्थिक वर्षमा बजेटमै व्यवस्था गरि थप २५ वटा खुल्ला व्यायामशाला निर्माण गरिसक्ने पौडेलले प्रतिबद्धता व्यक्त गर्नुभयो ।
