१८ फागुन २०७९
प्रदेशसभाको दुई तिहाइभन्दा बढी मतले प्रदेश १ को नामाकरण ‘कोशी प्रदेश’ पारित भएको छ। सभामुख बाबुराम गौतमले बुधकार राति भएको मतदानमा कोशी प्रदेशको प्रस्तावमा ८२ मत, विपक्षमा ४ मत खसेको घोषणा गरेका छन्। मतदानमा ८६ जना सांसद सहभागी थिए।
नेकपा एमालेका सांसद रामबहादुर मगरले प्रस्ताव पेस गरेको उक्त नाममा एमाले सांसदद्वय विदुर लिंथेप र निरन राईले समर्थन गरेका थिए। कोसी प्रदेशको पक्षमा नेकपा एमालेसहित नेपाली कांग्रेस, नेकपा माओवादी र राप्रपाका सांसदले मतदान गरेका थिए। यसअघि नेकपा एकीकृत समाजवादीका संसदीय दलका नेता राजेन्द्रकुमार राईले प्रस्ताव गरेको किराँत–लिम्बूवान–सगरमाथा प्रदेश स्वतः अस्वीकृत भएको थियो ।
