२६ भदौ २०८०,
एसिया कपको सुपर फोर खेलमा पाकिस्तानमाथि भारतले सानदार जित निकालेको छ । भारतले पाकिस्तानमाथि २ सय २८ रनको फराकिलो अन्तरको जित निकालेको हो । जितका लागि ३ सय ५७ रनको विजयी लक्ष्य पछ्याएको पाकिस्तान ३२ ओभरमा १ सय २८ रनमा अल आउट भयो ।
पाकिस्तानका अघा सलमान र इफ्तिखार अहमदले सर्वाधिक २३–२३ रन बनाए । ओपनर फखार जमान २७, इमाम उल हक ९, बाबर आजम १० र मोहम्मद रिजवान २ रनमा आउट भए । भारतका स्पिनर कुलदीप यादवले ८ ओभरमा २५ रन खर्चेर ५ विकेट लिए । जस्प्रित बुमराह, हार्दिक पान्ड्या र शार्दुल ठाकुरले एक एक विकेट लिए । त्यसअघि श्रीलंकाको कोलोम्बोमा टस हारेर पहिला ब्याटिङको निम्तो पाएको भारतले निर्धारित ५० ओभरमा २ विकेट गुमाउँदै ३ सय ५६ रन बनाएको थियो । भारतको जितमा विराट कोहलीले ९४ बलमा ९ चौका र ३ छक्कासहित सर्वाधिक १ सय २२ रनको शतकीय इनिङ खेले । लोकेश राहुलले १ सय ६ बलमा १२ चौका र २ छक्कासहित १ सय ११ रनमा नट आउट रहे । तेस्रो विकेटका लागि कोहली र राहुलले १ सय ९४ बलमा २ सय ३३ रनको सानदार अविजित दोहोरो शतकीय साझेदारी गरेका थिए । पाकिस्तानका शादब खानले १० ओभरमा १ मेडनसहित ७१ रन खर्चेर १ विकेट लिए । शाहिन शाह अफ्रिदीले १० ओभरमा ७९ रन खर्चेर १ विकेट लिए ।आइतबार वर्षाको कारण भारतले २४।१ ओभरमा २ विकेट गुमाउँदै १ सय ४७ रन बनाएको अवस्थामा खेल स्थगित भएको थियो । भारतले त्यसै अवस्था खेल सुरु गरेको थियो । भारतले मंगलबार श्रीलंकासँग खेल्नेछ । पाकिस्तानले बिहीबार श्रीलंकासँग खेल्नेछ । सुपर फोरमा भारतले पाकिस्तानलाई पराजित गर्दा पाकिस्तानले बंगलादेशलाई पराजित गरेको थियो । पाकिस्तान फाइनलमा पुग्न श्रीलंकालाई हराउनु पर्ने बाध्यता छ । पाकिस्तानमाथिको सानदार जितले भारतको फाइनल यात्रा मजवुद बनेको छ ।
