मोरङ, सुनवर्षी नगरपालिका- लागूऔषध कारोबारमा संलग्न रहेका दुई अभियुक्त प्रहरीले पक्राउ गरेका छन्। मोरङ जिल्ला, सुनवर्षी नगरपालिका वडा नं. ८ हर्चनगढी टोलका २८ वर्षीय प्रदिप कुमार राजवंशी र २२ वर्षीय अपसर आलमले भारतबाट लागूऔषध खरिद गरी नेपालमा बिक्री वितरण गरिरहेको भन्ने जानकारीका आधारमा प्रहरीले उनीहरूलाई पक्राउ गरेको हो।
मिति २०८१।०५।१९ गते दिनको १५:०० बजेको समयमा सुनवर्षी नगरपालिका वडा नं. ६ खिर्कीडाँगीस्थित भित्री सडक खण्डमा प्रहरी टोलीले चेकजाँच गर्ने क्रममा मे ६ प १८२८ नं. को स्कुटरमा सवार राजवंशी र आलमलाई नियन्त्रणमा लिने प्रयास गर्दा उनीहरू फरार भएका थिए। फरार हुने क्रममा प्रदिप कुमारले साथमा रहेको झोला धानखेतमा फ्याँकेका थिए। प्रहरीको चेकजाँचमा झोलामा प्रतिबन्धित लागूऔषध Tramadol Hydrochloride Capsule IP 50 mg का २४२ पत्ता, जसमा कुल २,४२० क्याप्सुल रहेको फेला परेको थियो।
प्रहरीले राति २३:०० बजे राजवंशीलाई आफ्नै घरमा लुकी बसेको अवस्थामा नियन्त्रणमा लिएको थियो भने आलमलाई पनि केही समयपछि पक्राउ गरियो। उनीहरूलाई मिति २०८१।०५।२० गते अदालतबाट पाँच दिनको म्याद थप गरी लागूऔषध कसूरमा कानूनी प्रक्रिया अघि बढाइएको छ।
