१३ पुस २०७९,
सत्तारुढ गठबन्धन दल नेकपा एमाले र माओवादी केन्द्रले प्रदेश १ सरकारको नेतृत्वमा दाबी गरेका छन् । दुवै दलले संसदीय दलको बैठकबाट नेतृत्वमा दाबी गर्ने निर्णय गरेका हुन् ।
दुई दलले आफ्नो नेतृत्वमा सरकार गठनका लागि छलफल गर्न वार्ता समिति गठन गरेका छन् । माओवादी केन्द्रले प्रदेश १ इञ्चार्ज राम कार्की र नेकपा एमालेले प्रदेश १ संसदीय दलको नेता हिक्मतकुमार कार्कीको नेतृत्वमा वार्ता समिति गठन गरेकाे हाे । दुवै समितिले आफ्नो नेतृत्वमा सरकार गठनका लागि छलफल सुरु गरेका छन् ।
माओवादीले गठन गरेको तीन सदस्यीय वार्ता समितिको सदस्यमा माओवादी केन्द्र प्रदेश १ संसदीय दलका नेता इन्द्रबहादुर आङ्बो र पार्टीको प्रदेश १ कमिटी अध्यक्ष हर्कबहादुर नेम्वाङ मिक्सो छन् ।
प्रदेश १ सरकारको नेतृत्व दाबी गरिरहेको नेकपा एमालेले यसअघि नै वार्ता टोली गठन गरेको थियो । एमाले प्रदेश संसदीय दलका नेता हिक्मतकुमार कार्कीको संयोजकत्वमा एमालले पाँच सदस्यीय वार्ता टोली गठन गरेको हो । टोलीले सरकार गठन र अन्य विषयमा दलहरुसँग छलफल गर्न टोलीका सदस्य रेवतीरमण भण्डारीले बताए ।
माओवादी केन्द्र प्रदेश १ संसदीय दलका नेता आङ्बोले सरकारको नेतृत्वमा आफ्नो पार्टीले दाबी गर्दै छलफलका लागि वार्ता टोली गठन गरेको बताए । २०७४ सालमा एमालेसँग तालमेल हँुदा माओवादी केन्द्रले सरकारको नेतृत्व नपाएको बताउँदै उनले यो पटक पाउनुपर्ने बताए । वार्ता टोलीले प्रदेशमा दलहरुसँग छलफल गर्ने उनले बताए । सोही टोलीले पार्टीको केन्द्रीय नेतृत्व र गठबन्धन दलको नेतृत्वसँग पनि छलफल गर्ने उनको भनाई छ ।
९३ सदस्यीय प्रदेश १ को प्रदेशसभामा माओवादी केन्द्रले १३ सिट जितेको छ । नेकपा एमालेसँग ४० सिट छ । सत्ता गठबन्धनमा रहेको राप्रपासँग ६ र जसपासँग एक सिट छ । नेपाली कांग्रेसको २९ र नेकपा एकिकृत समाजवादी पार्टीको ४ सिट छ ।
