सोमबार, ११ भदौ २०८०
साबिक विजेता बार्सिलोनाले स्पानिस ला लिगाको खेलमा भिल्लारियललाई पराजित गरेको छ । सात गोल भएको खेलमा ४–३ गोल अन्तरले पराजित गरेको हो । बार्सिलोनाका लागि रोबर्ट लेवान्डोस्कीले ७१औं मिनेटमा विजयी गोल गरेका थिए । १५ मिनेटभित्रै दुई गोलको अग्रता बनाएको बार्सिलोनोनाले त्यसपछि लगातार तीन गोल खाएको थियो । ५० मिनेटसम्म ३–२ ले पछि रहेको बार्सिलोनाका लागि फेरान टोरेस र लेवान्डोस्कीले तीन मिनेट अन्तरमा दुई गोल गरेपछि बार्सिलोनाले खेल जितेको हो । गावीले १२औं र फ्रेन्की डे जोङले १५औं मिनेटमा गोल गरेपछि बार्सिलोनाले २–० को अग्रता बनाएको थियो । तर भिल्लारियलले घरेलु मैदानमा पुनरागमन गर्यो । जुयान फोथले २६ औं र अलेक्जान्डर सोर्लोथले ४०औं मिनेटमा गोल गरेपछि पहिलो हाफमै खेल २–२ को बराबरीमा पुर्यायो । त्यसपछि ५०औं मिनेटमा अलेक्स बाएनाले गोल गर्दै भिल्लारियललाई ३–२ को अग्रता दिलाए । यो अग्रता पनि लामो समय टिकेन ।
६८औं मिनेटमा बार्सिलोनाका फेरान टोरेसले गोल गर्दै खेल ३–३ को रोमाञ्चक अवस्थामा पुर्याए । ७१ औं मिनेटमा रोबर्ट लेवान्डोस्कीले गोल गर्दै बार्सिलोनालाई ४–३ को जित दिलाए । यो बार्सिलोनाले निकालेको नयाँ सिजन दोस्रो जित हो । तीन खेलबाट ७ अंक जोडेको तेस्रो स्थानमा उक्लेको छ । शतप्रतिशत जितसहित ९ अंक जोडेर शीर्ष स्थानमा रहेको रियल मड्रिडभन्दा बार्सिलोना दुई अंकले पछि छ ।
